Heb 10 | BEF | STEP | Yuta bona'magihi keya ka ya'ma legeya'a alihi huto hilinamofihi babeyafa'a mone'a anasi ni'ibe. Legeya'a lamana'a meni'ibe. Ya hu'ehina mamufa gilata bona'i enali keya ka lu'ehina ka'alo kufu'amu kufu'amu lokiya fi emi'ahana ana suhi hilenogo hena keya ka koyo'ehinamofihi kugupouba Hu'mamofihi bulo bilata nehana bona'i ya'ma mone'na lusiga luto enele'mo bati hulata nohibe? Ya huto meni'ibe.

Hebrews 10

1 Yuta bona'magihi keya ka ya'ma legeya'a alihi huto hilinamofihi babeyafa'a mone'a anasi ni'ibe. Legeya'a lamana'a meni'ibe. Ya hu'ehina mamufa gilata bona'i enali keya ka lu'ehina ka'alo kufu'amu kufu'amu lokiya fi emi'ahana ana suhi hilenogo hena keya ka koyo'ehinamofihi kugupouba Hu'mamofihi bulo bilata nehana bona'i ya'ma mone'na lusiga luto enele'mo bati hulata nohibe? Ya huto meni'ibe. 2 Hu'mamofihi lipi emilata nehana bona'i ya'ma mone'na komopa'ani li gulu ligo lu epolo'ehinalo ni'itita komopa'anigu foipana'ani meni'igo minatita'mu yabe to asaga kuguhi lokiya fi emilata'na ya'ma he'mitita'mu yabe. 3 Ya hu'ehinaya kuguhi koyolata'namofihi ya'ma kufu'amu kufu'amu nekayago foipana'animu aku'i beto hite kehelilata nehabe. 4 Kuguhi koyolatana'mu to lokiya fi emilatana'mu mememagihi to bulumakamagihi golahi heki'ahana yanauba bona'magihi foipana'ani nokala hu epalalina'a to he'milina'a mone meni'ibe.

5 Ya hu'ehina'mu ya'ma Kilisitou melugu ma'asi limilube'mu nohuto afo'afihi lu emi'ehina ka'a ya'ma mono bukugu ma lite fayahi keye'ahanamo ni'ibe:

Kuguhi koyo epilata
ya'ma fato fato'mofi kumu
lagaka mekebesigo
ananamofihi kibita mehu'ehina.
Ya hu'ahataya,
nugufa lolo huto
le'mo hetofa hu'ahatamo ni'ibe.

Fato fato yagatu hete hosa hite

kuguhi keyete lokiya fi emi'ahana

yamofihi bu goto

laga'ni menebesibe luto lulata hu'ehina.

Foipana'ani he'mi su halibe luto

kuguhi keyelata nehago

mone kegelo mebilata nohane.

Ya hulago

nani ma luto lu'ohunamo ni'ibe:

O Hu'mao, kehelibo.

Kai lilata'a malalata'a hilube luto

kegeba huto nominobe.

Keya ka lu'ehina kamofihi fayaha'agu

nani kumu kaga koyo'ehinalo

ya huto lilube luto nohube.

8 Kohe toto luto lu'ehina:Yagamofihi kuguhi koyo emilata nehana to lokiya fi emilata nehana hiti fato fato'mofi kumu kegelo mebi'ahane, luto to fato fato yagatu hete laita hilete foipana'ani su halibe lite ana mamufa efaha hitalo gilata hi'ahana ya'ma ana suko huto bati mehu'ehinamo ni'ibe luto lagaka mekebesibe luto, yata'a ka lu'ehinamo ni'igo ya'ma anamofihi mamufa gilata foya ya'ma keya ka lu laga huto lu'ehina kaga'alo keyelata hi'ahanaya. 9 To aliha'a Kilisitou molo emito ma luto lu'ehina:O Hu'mao, kehelibo. Kai lilata'a malalata'a hilube luto kegeba huto nominobe, luto lu'ehina. Ni'inaya asaga mamufa gilatanamofihi tafa'a fato fato'i ni'igo Hu'mau li he'mito Kilisitohi ka'a ai'a keheli bati huloto Kilisitohi gufa'a mamufa gilata nohina yamofihi li molo'ehigo ya'ma kosaba'i li huto hu'ehina. 10 Ya hu'ehina'mu Hu'mamofihi ka'alo Yesu Kilisito kehelito gufa'auba kana'a moneko kanasigo mamufa gigo lali asaga'i foipanati li he'mi letoto komopati le'mo eto higo nohuta'a ya'ma aku'i mamufa ai'a gilina'mu yabe.

11 Yuta bona'magihi mamufa gi epololata asaga bona'magitoga enali kana'amu kana'amu foya'ani lite ho tilete nehite kuguhi keyete lokiya fi emiba emiba hite minelata hi'ahana ni'inaya asaga yupahi ya nasanauba ya'ma bona'magihi foipana'ani nokala hu epalalina suhi mehibe. 12 Kilisitou ya'ma foipanati su halibe luto ai'a golaha'atu mamufa gigo asu ho'ehibe. Yanamofihi gupisalo aku'i mamufa megilina'mu yabe. To ya huloto Hu'mamofihi yahi lamaga'aga mino moloto mino'ehina. 13 Yalo'i Hu'mamofihi fateha'a enele'mo lolo huto gigusa'atu iti kalube luto enegeba huto nohibe. 14 Ya huto komopati li gulu gulu hinogo lele'mo eto hulata kapolo bulata nohutamofihi mamufa moneko'i giloto lele'mo fotogo hulata kapolo malago asu ho'ehinamo ni'ibe.

15 Ya ni'inaya hetofa Sikalafu'uba ai'a hiti lu huto huto lu limi'ehinamo ni'ibe. Ai ka'a mono bukugu hapi fito ma luto ni'ibe:

16

Alihi kanalo lu mu tifise ka'a
li huto hu lepalalube luto
Sipi Bouba ma luto nolibe:
Nani lu laga huto noluna ka
ya'ma komopatinigu molo lepelenogo'ni
liminogo
komopatini lenegekesagu fayahi keyenogo'ni
minalinamo ni'ibe.

17 Ya luto luloto analo molo emito ma luto mone hiti lu'ehina:Foipana'ani'mu to laga mehina nasana'ani'mu aku'i kana'amu kana'amu mekehelilube'mu nohube, luto lu'ehina. 18 Ya luto nohigo foipana'ani lu he'mi epolo'ehigo ana foipana su holago ana'ina laga mehinanamofi kumu mamufa gilatana ya'ma ana suko huto su ho'ehibe.

Hu'mamofihi bulo nehetilune

19 Nalalu'nigita, ya hu'ehina'mu Yesuhi golaha'auba bebe sose nonugu Hu'mau nominanamofihi kafe sigi letago lali nohinagu tiluta'mu komopatigu lelesa melinogo ya'ma tilune. 20 Sipi mono nopofihi hasalo li hokolo huto ya'ma ai'a gufa'a legi huto mino'ehinaya yanauba hekini lo'ehina katamofihi li beyaga i luga luga huto Hu'mamofihi maha'aga bulatanamofihi mino kosaba kapo amuya moloto minolata nasana ai'a le'mo lamana hu leto'ehina. 21 Ai tiloto mamufa gilata bomofito sipi kibina bo lolo huto Hu'mamofihi yagapana'a lali'i latahatilo kaba boti nohibe. 22 Ya hu'ehina'mu komopati lusiga luto emiloto keheli ule'ale hinogo komopatigu okala huto foipana nasana'mu lekesa yigi yigi mehuse ya'ma ai'a golaha'atu lali'i okala hu su hoto folo letago komopati babahi higo to lugufati ya'ma hetofa nagami'i bu okaba'a suhi huto lolo hu'ehinalo nagamitu ko letelenogo minoto Hu'mamofihi bulu nehetilune. 23 Ya nohinogo Hu'mau ka'a lu molo'ehigo ana mololata bo aitoga buto lifita ito to fifa ito lulata nohuta ya'ma le'mo hetofa huto kaba huto mino'ehina yabe. 24 Komopatitu lemehi emito komopati ai eminogo ai eminogo nohuto lili'nalo ai he'menogo ai he'menogo huto minalune luto komopati le'mo bati huse'namofihi kapo'mu sa sa huto minalune. 25 Ya nohutoti mono kumu li gehesa hulatanagu luga'amagi menehetise amanapa hite neminana'a nehabe. Ya hilata nehana enali suhi mehuse kana'amu kana'amu Sipi Bouba alina kana'a lebato huto nohinago yamofi kumu kehelito minoto enele'mo hetofa huto amuya moloto minalune.

26 To lali Hu'mamofihi ka legeya'a yauba komopatigu fi besa lolenogo legekesa kehelito foipana aku'i lilune luto nolunogo foipanati'mu ya'ma kehelito le'mo eto huto linogoti foipanati su halibe luto mamufa gilata nasana mone meni'ibe. 27 Ya huto ni'igopa yamofihi foipana'a babu luto ketanamofi kumu ligiki nebinogo geba huto minalune. Logo guluya meha'auba Hu'mamofihi luba li emilata nehana bona'i ya'ma akafu'i heni epalalina'mu yabe. 28 To Moseu keya ka lu'ehina ka'alo pelesa ite hauta halana bona'i ya'ma kene'i loemale'ifi loegi monegimagifi enali ka'ani lilago enali hapa hapa'ani foipana'ani huto hulago keke'i meli epelese mele'isi eba eba hite enoho fili'ahana yabe. 29 Yanauba keta hu tegi huto ni'inaya, bo moneubafi moneuba Hu'mamofihi pana'amofitoga megesa hu emilina to mino hepito mu tifise'namofihi kaga'alo golahi lepe tepe hu'ehina nasanauba komopa'a le'mo fana to'ehina yamofihi ai bu goto fa'mene lolo huto nohilina bomofihi Hu'mau hena hu etalina ni'ibe? To lehe'mose afo'afu Sikalafu'i yamofihi le'mo laba hilina ya'ma bomofihi Hu'mau hena hu etalina ni'ibe lite lenekesa nekehelibe. Ai le'mo sibina hu'ehinana'a sipi huto to keta'a hiti lilina'mu yabe. 30 Moneko'uba lili'na ka ma luto lu'ehina:Foipana epilata nasana ya'ma nani foya'nimofihi mone kegi'a beletoga ni'ibe. Pa solatana ya'ma nani'ni pa salube, luto lu'ehina. To mone hiti:Sipi Bo ai yagapana'a enalitoga ka foya lito guna molo epalalube'mu nohibe, luto lu'ehina bo ai hapa'a kehelilata nohune. 31 Yalo'i kana'a sipi yupahi minoba minoba huse bo Hu'mamofihi yanugu fololata nohuta ya'ma koli'a hiti nasana felana ni'ibe.

32 Lenali koyapa'i ana'ina lolo hite mine'ahanamofihi aku'i kehelilo. Kana'a ya'ma yupahi komopatinigu Hu'mamofihi fana meha'auba fi fana to lepelenogo keke'i luse'namofihi komopa'agu minete keta'a hiti foya lite amuya melete lite mine'ahana. 33 To kana'a loemo lenali lenagabu gise'nauba lenugupisalo tilago bona'magihi enubulo enumu fili enama fili hite kalana'i molo lepalago lenali fa'mene mine'ahana. To kana mone'agu ya'ma lenigibo lenalalutinigihi ana'ina ya suhi lolo nehi epalago hite molo emite keke'i li epele'ahana. 34 Lenali lenigibo lenalalutinigihi naga nonugu nehago enali kumu yabe lite komopatinigu ekafa'i ho'ehinamo ni'ibe. To asaga fe'nohatini bauna fite lilago ya'ma komopatinimofihi fe'nohi lamana'a amuya moloto minomo buse'namofihi molo'ohune lite kehelilete lenegelo bilata hi'ahanamo ni'ibe. 35 To yatai ya'ma Hu'mamofitoga lenifita ilata nasana mehe'milo. Ya nasanauba minoto aliha'a mina'a sipi'a li huto hu lepalalina'mu yabe. 36 Yana'mu lenali keta'a hiti'namofihi komopa'agu mino fulu hite minelenogo Hu'mau lilina malalina ka'a kehelite nehinogo ana'ina le'mo babahi huse'namofihi legeya'a lilabe. 37 Ya hu'ehina'mu mono bukugu fayahi mone ma lite keye'ahanamo ni'ibe:

Kana'a hupamone ni'ibe.
Yamofihi su nehenogo
alube'mu nohinagihe.
Alibe lite li'ahanamo
ya'ma mino yatama mehuse
mele'isi nehetilina'mu yabe.

Bona'ni lamana hi'ahanamagi

enali keheli ule'ale hite minete

mino kosaba'i lilete minoba minoba hilabe.

To luga'amagi enali he'mite i behe hite

bilana'a ya'ma enali kumu kehelugo

laga'ni menebesilina'mu negelo mebilube.

39 To lali amuya memolose kosele kasele'i hoto minaluta'a to i behe huto tafa kapomofihi nasana lolo mehiluta'mu yabe. Lali ya'ma kehelito amuya moloto lemehi emito lubuto bilatanamofihi nasana ya'ma lilune.